شروط الخدمة

1.من نحن وشنو كنقدمو

Smarestau هي منصة كتخلي المطعم يجمع الزبائن ديالو عبر رمز QR، ويبقى على تواصل معاهم عبر واتساب (كوبونات ترحيب، مكافآت الزيارات، حملات). الخدمة كتشمل الصفحة العمومية ديال المطعم، لوحة التحكم، دفتر الزبائن، والرسائل.

هاد الشروط كتطبق على المطعم («أنت») اللي كيستعمل المنصة. الزبائن ديالك ما عندهمش علاقة تعاقدية معانا — العلاقة ديالهم هي معاك.

2.الحساب

خاصك تكون عندك 18 عام وتكون مخوّل باش تمثل المطعم. أنت مسؤول على كل شي كيتدار من الحساب ديالك، بما فيه ما كيديروه العاملين اللي كتدعي. البسوار و كود الـPIN ديال الكيوسك خاصهم يبقاو عندك — مشاركتهم مسؤوليتك.

3.الأداء

• الاشتراك شهري، كيتخلص كاش أو حوالة بنكية عند ممثل Smarestau. الثمن المتفق عليه كيبان فـ الإعدادات ← الاشتراك.
• ملي كتسالي الفترة بلا أداء، الحساب كيولي «متأخر» وعندك 14 يوم ديال السماح. من بعد الخدمة كتوقف (suspended).
• بعد 60 يوم ديال التوقيف بلا أداء، الاشتراك كيتلغى والمطعم كيدخل لمرحلة الأرشفة — شوف §7.
• تقدر توقف الاشتراك فأي وقت بلا عقد طويل. ما كنرجعوش الفلوس على الشهر اللي بدا.
• إلا بدلنا الثمن، كنعلموك 30 يوم قبل. تقدر توقف قبل ما يدخل الثمن الجديد.

4.الرسائل — أنت المسؤول على المحتوى

Smarestau كتوفر القناة؛ المحتوى ديال العرض هو ديالك. أنت اللي كتضمن أن:

• العرض اللي كتصيفط حقيقي وكتحترمو فالمحل.
• ما كتصيفطش رسائل لشي واحد اللي طلب يوقف (STOP)، ولا كتزيد أرقام ما جاتش من مسح QR ولا من الزبون بنفسو.
• المحتوى ما فيهش شي حاجة ممنوعة قانونيا ولا كتخرق قواعد واتساب / Meta (كحول، تبغ، قمار، ادعاءات صحية…).

أنت المسؤول القانوني (responsable de traitement) على بيانات الزبائن ديالك؛ Smarestau كتعالجها نيابة عليك (sous-traitant) وفق سياسة الخصوصية.

5.الرقم المشترك · حق التوقيف

كل المطاعم على المنصة كيصيفطو من رقم واتساب واحد مشترك. إلا الزبائن ديال مطعم واحد بداو يبلغو على الرسائل (Report / Block)، Meta كتنقّص من جودة الرقم — وهادشي كيضر جميع المطاعم فنفس الوقت.

علاش: كنحتافظو بالحق باش نوقفو الإرسال من حساب معين فورا وبلا إشعار مسبق ملي نلاحظو ارتفاع فالتبليغات، ولا رسائل خارجة على §4، ولا أي حاجة كتهدد جودة الرقم. كنعلموك من بعد التوقيف ونشرحو ليك السبب، وكنرجعو الخدمة ملي تتصاوب المشكلة.

هاد البند ماشي عقوبة — هو الشي الوحيد اللي كيخلي مطعم واحد ما يقدرش يقطع الخدمة على الباقيين.

6.التوفر والحدود

• كنديرو اللي فينا باش الخدمة تبقى خدامة، ولكن ما كنضمنوش توفر 100٪. كنعتمدو على خدمات خارجية (واتساب/Meta، Infobip، الاستضافة) وما عندنا حتى تحكم فالانقطاعات ديالهم.
• ما كنضمنوش أن رسالة معينة غادي توصل — واتساب هو اللي كيقرر التسليم. ما كنضمنوش أي نتيجة تجارية ولا رقم معين ديال الزبائن.
• المسؤولية ديالنا فأي حالة محدودة فـ مجموع اللي خلصتي فـ 3 أشهر اللي فاتو. ما كنتحملوش الأضرار غير المباشرة (ربح ضائع، سمعة، فرصة).
• هاد الحدود ما كتطبقش على الخطأ الجسيم ولا الغش ولا شي حاجة القانون المغربي ما كيسمحش بحصرها.

7.التوقيف والحذف

ملي يتوقف الاشتراك — منك ولا مننا — المطعم كيدخل لمرحلة «موقوف» مدة 14 يوم. فهاد المدة تقدر ترجع بلا ما تخسر حتى شي حاجة. من بعدها المطعم كيتأرشف: أسماء الزبائن، الأرقام، ونصوص الرسائل كيتمحاو نهائيا وما كيمكنش نرجعوهم. قبل ما توقف، تقدر تصدر دفتر الزبائن ديالك من الإعدادات ← الخصوصية.

8.الملكية

المنصة، الكود، والتصميم ديالنا. الصور، المنيو، الإسم والمحتوى اللي كتحط أنت — ديالك. كتعطينا رخصة باش نعرضوهم فالصفحة العمومية ديال المطعم وفالرسائل، وغير لهاد الغرض.

9.التبديلات

إلا بدلنا هاد الشروط بشكل جوهري، كنعلموك بالإيميل 30 يوم قبل. إلا كملتي كتستعمل الخدمة من بعد التاريخ ديال السريان، يعني وافقتي. كل نسخة عندها رقم (2026-09-12) وكنسجلو النسخة اللي وافقتي عليها ملي صاوبتي الحساب.

10.القانون والاختصاص

هاد الشروط كتخضع للقانون المغربي. أي نزاع كيرجع للمحاكم المختصة بالمغرب. قبل أي مسطرة، كنتافقو نحاولو نلقاو حل ودي فـ 30 يوم.

11.التواصل

صيفط لينا واتساب من الصفحة ديال الدخول ولا من لوحة التحكم. كنردو فأقل من 24 ساعة.